WANAWAKE WAWILI WAGOMBANI MTOTO,KILA MMOJA ADAI NI WAKE ,MKASA MZIMA UKO HAPA

POLISI Kaunti ya Kericho, Jumatatu walikumbana na kazi ngumu ya kutegua kitendawili kuhusu mzazi halisi wa mtoto msichana mwenye umri wa miezi minne anayepiganiwa na wanawake wawili.

Kila mmoja wa wanawake hao anadai kwamba ndiye mzazi halisi wa mtoto huyo na polisi wameamua kufanya uchunguzi wa chembechembe za jenetiki (DNA), ili kubaini ukweli. 

Kabla ya matokeo ya uchunguzi huo, itabidi mtoto huyo abaki na majina mawili - Cynthia Achieng, anavyodai Bi Mercy Amenya, mkazi wa Eldoret, au Naomi Chepkoech kama anavyodai Bi Joyce Chepkemoi.

Hapo Jumatatu wanawake hao walirushiana maneno makali katika kituo cha polisi cha Kericho kila mmoja akimlaumu mwenzake kwa kudaganya ndiye mama wa mtoto huyo.

Bi Amenya anadai kwamba Joyce aliiba mtoto huyo, madai ambayo Joyce amekanusha vikali. Bi Amenya anadai alimuajiri Joyce kuwa yaya nyumbani kwake kabla ya kumwibia mtoto.

Lakini Joyce anadai Bi Amenya anataka kumnyang’anya mtoto.

Bi Amenya anadai kwamba alijifungua mtoto huyo mnamo Juni 14  mwaka huu katika hospitali ya wilaya ya  Narok, ilhali Joyce anadai alijifungua Mei 14, katika hospitali ya wilaya ya Siongiroi, Kaunti ya Bomet.

Bi Amenya aliambia Taifa Leo kwamba alimuajiri Joyce ingawa hakuwa na stakabadhi za kujitambulisha na hakufichua alikozaliwa akidai alitoka Chebunyo, Kaunti ya Bomet na wakati mwingine kudai alizaliwa Nandi.

“Nilimchukua msichana huyo nilipompata Narok akionekana mdhaifu na nikamhurumia. Baadaye nilimwajiri yaya nyumbani kwangu na sikujua anaweza kuiba mtoto wangu,” akasema akitokwa na machozi.

Bi Amenya anadai kuwa siku ambayo mtoto aliibwa alimuacha na Joyce akaenda kazini Kericho na aliporudi nyumbani kupeleka nguo alizonunua akapata ametoweka na mtoto.

“Nilipata nyumba imevurugwa. Kifungua mimba wangu Kibet aliniambia yaya aliondoka na mtoto na kubeba nguo. Niliwauliza majirani na wakaniambia walimuona akitoka na akawaambia atarudi,” akasema.

Kukagua nyumba

Bi Amenya alisema alipiga ripoti katika kituo cha polisi cha Baharini na akaagizwa akague nyumba kujua kama kuna mali nyingine iliyoibwa na akagundua vyeti vya matibabu vya mtoto na Sh1,000 zilikuwa zimetoweka.

 “Baadaye Joyce alimpigia simu mumewe na kumtaka amtumie pesa ili arudishe mtoto. Polisi walifuata mawasiliano ya simu hiyo na kumkamata na ninashangaa akisema mtoto ni wake,” akasema.

Lakini Joyce alikanusha alikuwa yaya wa Bi Amenya akisema hakumuona mtoto mwingine kwake alipokuwa mgeni wake. Anakiri kwamba alikutana na Bi Amenya eneo la Chebown, Kericho, alipokuwa hana mbele wala nyuma baada ya kujifungua mtoto msichana.

Aliambia Taifa Leo kwamba hana vyeti vya kuzaliwa vya mtoto huyo. “Chepkoech ni mtoto wangu na ana umri wa miezi minne. Nilipokuwa katika nyumba ya Mercy hakuwa na mtoto isipokuwa mvulana aliyeitwa  Kibet,” akasema.

Kamanda wa polisi wa Kericho, Bi Rose Muchuma, alisema kesi ya utekaji nyara mtoto iliripotiwa Eldoret na mshukiwa akakamatwa eneo la Chebown, Kaunti ya Kericho, baada ya polisi kufuatilia mawasiliano ya simu.

CHANZO:SWAHILIHUB

Share on Google Plus

About Omari Makoo