ALIYEWAUA YANGA AWAUA NA KMKM,GOR MAHIA IKIUA 3 KWA 1

Gor Mahia imekuwa timu ya kwanza kutinga kwenye hatua ya robo fainali kwenye michuano ya Kagame Cup baada ya kuibuka na ushindi kwenye michezo yake miwili kwenye Kundi A, kundi pekee lenye timu tano kwenye michuano ya Kagame. Gor Mahia waliibuka na ushindi wa goli 2-1 kwenye mchezo wao wa ufunguzi kwa kuifunga Yanga na leo wameitwanga KMKM goli 3-1 na kuongoza Kundi A kwa kuwa na pointi sita huku wakiwa wamefunga magoli matano wakati wao wamefungwa magoli mawili.

Mshambuliaji wa Kenya Michael Olunga amezidi kung’ara kwenye michuano ya Kagame Cup baada ya kufunga magoli mawili kwenye mchezo wa leo uliopigwa kwenye uwanja wa Taifa kati ya KMKM ya Zanzibar dhidi ya Gor Mahia ya Kenya.

Gor Mahia ndio walikuwa wa kwanza kupata goli kupitia kwa Kagere Medie dakika ya tatu kipindi cha kwanza lakini goli hilo lilisawazishwa na Mateo Antony Saimon dakika ya 11 na kuzifanya timu hizo kwenda mapumziko zikiwa sare kwa kufungana goli 1-1.

Kipindi cha pili KMKM ilishindwa kuhimili kasi ya Gor Mahia kwani dakika ya 69 Michael Olunga aliifungia Gor Mahia goli la pili, wakati KMKM wakiwa katika harakati za kuhakikisha wanasawazisha goli hilo Olunga tena akarejea kambani na kuiandikia Gor Mahia goli la tatu na la ushindi kwa upande wa Gor Mahia.

KMKM ilijitahidi kucheza vizuri kipindi chote cha kwanza lakini makosa madogomadogo yaliwakosesha ushindi. Walijitahidi kutengeneza nafasi za kufunga lakini walishindwa kuzitumia nafasi hizo kupata mabao. Licha ya kupiga mpira mwingi leo, Juma Mbwana Faki alikosa goli akiwa amebaki yeye na kipa, Mateo Saimon na yeye pia alipoteza nafasi kadhaa za kufunga.

Kikosi cha KMKM

Mbali na kukubali kichapo hicho cha magoli matu, KMKM ilionesha mpira mzuri hasa kipindi cha kwanza na kuwapa matumaini wadau wengi wa soka la Tanzania huenda wakaweza kuutafuna mfupa uliomshinda Yanga lakini kipindi cha pili mambo yalibadilika na kujikuta wakiruhusu magoli mawili.

Olunga mpaka sasa ameshafunga magoli matatu baada ya kucheza mechi mbili. Mchezo wa kwanza alifunga goli moja wakati timu yake ikicheza dhidi ya Yanga na leo ametupia kambani goli mbili na kuipeleka timu yake kwenye hatua ya robo fainali ya michuano hiyo.