MTOTO WA GADAFFI AONEKANA LIVE KWENYE TV AKIWA JELA BAADA YA UVUMI KWAMBA AMETOROKA

Baada ya kuzagaa taarifa za kuwa mtoto wa Gaddafi, Saif al Gaddafi ametoroka katika jela aliokuwa amewekwa, kituo cha televisheni cha Al assema cha nchini Libya kimeonesha video ya mahojiano na Saif wiki iliyopita.

Hii ni mara ya kwanza Saif al Gaddafi  kuonekana katika televisheni ya Al-assema ya Libya tangu kukamatwa kwake mwaka 2011.

Mahojiano hayo yalifanyika ndani ya jela aliofungwa huko kusini mahgaribi mwa mji mkuu wa nchi ya Libya. Kituo hiko cha televisheni kiliruhusiwa kumuuliza maswali matatu tu.

Moja ya swali aliloulizwa ni kuwa je anataka kesi yake isikilizwe Tripoli badala ya Zintal ambapo ni kilomita 180 toka mji mkuu. Alijibu kwamba Zintah ipo ndani ya nchi ya Libya kwa hiyo hakuna tofauti na Tripoli.

Waasi wa Zintah ndio wanaomshikilia Saif al Gaddafi na wamekataa kumpeleka katika mahakama ya mji wa Tripoli. Muda wote aliokuwa akiongea Saif al Gaddafi alikuwa akiweka mkono wake juu ya mdomo kuficha sehemu iliyong'oka jino lake la mbele.

Mtoto huyo wa Marehemu Gaddafi, alionekana ni mwenye afya njema akiwa amekaa katika kitanda na mavazi ya sare za jela ya rangi ya bluu. Hakuonekana kuwa na raha muda wote wa mahojiano.

Wakati huo huo, Serikali ya Libya imeombwa imkabidhi Saif al Gaddafi kwa mahakama ya kimataifa ya uhalifu, ICC, ili afunguliwe mashtaka. Wito huo umetolewa na Mwendesha Mashtaka wa ICC, Fatou Bensouda, wakati akilihutubia Baraza la Usalama kuhusu hali nchiniLibya. 

Bi Bensouda amesema Libya imepiga hatua kadhaa kisheria, ikiwemo kuridhia mkataba wa Rome, ambao uliiunda mahakama ya ICC. Hata hivyo, amesema kesi dhidi ya Saif al Gaddafi bado inatakiwa kusikilizwa na mahakama ya ICC, na kuiomba serikali yaLibya imkabidhi kwa mahakama hiyo.

“Jukumu la kuwasalimisha kwenye mahakama watu ambao waranta za kukamatwa zimetolewa dhidi yao ni lazima liheshimiwe. Hisia za kisiasa hazina nafasi katika sheria, ikitumiwa kwa haki na uhuru. Natoa wito kwa serikali ya Libya kumsalimisha Saif al Gaddafi kwa mahakama ya ICC bila kuchelewa",alisema Bi Bensouda.

Bi Bensouda ametoa wito kwa Baraza la Usalama liikumbushe na kuisihi serikali ya Libya kuitikia maombi ya mahakama ya ICC, na kutoa wito kwa nchi zote wanachama ziheshimu na kutekeleza maamuzi ya majaji wa mahakama hiyo.

Share on Google Plus

About Omari Makoo