HUWEZI KUMSAFISHA MTU WAKATI MIKONO YAKO NA WEWE NI MICHAFU ASEMA MTATURU

Mtaturu akisisitiza jambo wakati wa mkutano

Na Mathias Canal, Mufindi

Wakazi wa Mtaa wa Kinyanambo, Kata ya Kinyanambo, Wilayani Mufindi wameaswa kuchagua viongozi watakaowaletea maendeleo katika mitaa yao ili kukabiliana na mabadiliko ya kujitegemea kwa Mamlaka ya mji wa Mafinga.

Akihutubia wananchi waliojitokeza Katika Mtaa wa Kinyanambo, mkutano huo wa kampeni kwa ajili ya viongozi wa serikali za Mitaa, Vitingoji na Vijiji ambapo uchaguzi unatarajia kufanyika Disemba 14, Katibu wa Chama Cha Mapinduzi (CCM) Wilaya ya Mufindi, Miraji Mtaturu, alisema kuwa wananchi wanapaswa kuchagua viongozi watakaowatumikia kwa ufanisi na uwezo mkubwa kwa miaka mitano ijayo.

Alisema kuchagua viongozi wa vyama vya upinzani ni kufunga shughuli za maendeleo hivyo ni vyema kuchagua CCM ili kuendelea kukamilisha ahadi na ilani ya chama hicho.

"Ni bora kuwa mchawi kuliko mnafiki, mimi nawahakikishia kuwa vyama vya upinzani ni maalumu kwa ajili ya kuvuna pesa za wananchi( SACCOS) sio kwa ajili ya maendeleo yao" Alisema Mtaturu

Mtaturu alisema watanzania wanapaswa kutambua kuwa uchaguzi wa serikali za mitaa, vitongoji na vijiji ni muhimu kwa kuwa viongozi hao ndio wachapaji kazi za wananchi na wanatekelezaji kazi za wananchi kwa ufasahasa katika kutekeleza ilani ya Chama Cha Mapinduzi (CCM).

"Kuna msemo waswahili wanasema usione vyaelea ujue.....wananchi wakaitikia VIMEUNDWA, basi kama mnalijua hilo msidanganywe na vyama vya msimu ambavyo havijui kwamba sisi tunatekeleza ilani ya chama na safari hii tumeianza muda mrefu hivyo abiria anayepandia njiani hawezi kujua nauli ya mwanzo wa safari" Alisema Mtaturu

Alisema kuwa Hakuna binadamu anayeweza kumsafisha binadamu mwenzake wakati mikono yake ni michafu, hivyo vyama vya upinzani vimekuwa vikiikosoa sana serikali kwa kila jambo inalolifanya pasipo kujali kuwa ni baya au zuri wakati vyama hivyo havina jambo lolote la kujivunia kwa maendeleo ya watanzania zaidi ya maandamano na vurugu ambazo zimesababisha wananchi wengi kupata ulemavu na wengine kupoteza maisha.

Mtaturu alitumia nafasi hiyo pia kuwanadi wagombea wote wanaowania nafasi za uongozi katika Mitaa mbalimbali ambapo wananchi walionekana kuitikia kwa wingi kufurahia wagombea wanaowania nafasi hizo jambo ambalo CCM imeona kuwa linaendelea kujenga imani ya chama hicho kwa wakazi wa Kinyanambo na Taifa kwa ujumla.

Alisema CCM ina amini katika misingi ya uvumilivu, heshima na nidhamu ndio maana hata wabunge wake huchangia hoja mbalimbali bungeni pasipo jazba na hasira badala yake hutumia hekima na ustaarabu wakiamini kwamba wananchi wanawasikia kwa kila jambo wanalolifanya.

Aidha alisema kuwa CCM ni chama kisichochagua wananchi wa kuwatumikia bali huwapa nafasi wananchi wake kuchagua viongozi wao wanaowataka katika ngazi mbalimbali kwani kufanya hivyo ni kutenganisha uongo na ukweli ambao wananchi wengi wanahitaji kufahamu.

Share on Google Plus

About Omari Makoo